Mirësevini, vizitor! [ Regjistrohuni | Kyqunirss

Komunat mund të mbesin pa 200 milionë €

| Ekonomi, Kosovë | 5 September 2011

Foto: Laura Hasani

Rreth 200 milionë euro grante të qeverisë nuk kanë arritur t’i shfrytëzojnë komunat e Kosovës, për shkak të vonesave që kane qenë në bartje të granteve si pasojë e miratimit të vonshëm të Buxhetit të Konsoliduar të Kosovës.

Edhe pse qeveria i ka dërguar me vonesë grantet, ajo është duke bërë përpjekje që t’i kthejë prapa ato 200 milionë euro të tjera të pashfrytëzuara nga komunat.Komunat e Kosovës nuk kanë arritur të shfrytëzojnë sipas planit të paraparë paratë për investime kapitale, kështu kanë filluar shqetësimet e kryetarëve në lidhje me rrezikshmërinë që mund t’i humbin grantet qeveritare, ende pa i shfrytëzuar ato.

Disa kryetarë të komunave kanë bërë me dije se kanë marrë sinjale nga qeveria për kthimin e parave. Ata ankohen se fajin e ka Qeveria, meqë është vonuar me miratim të buxhetit, prandaj sipas tyre tërheqja e këtyre parave nuk është e drejtë, edhe nëse është e lejueshme.

Janë 400 milionë euro grante qeveritare që komunat i kanë marrë këtë vit dhe prej gjithë kësaj shume rreth 200 milionë nuk janë shfrytëzuar, e të cilat do t’i marrë qeveria, bëjnë të ditur burimet e “Zërit” brenda qeverisë. Madje sipas këtij burimi, qeveria veç e ka bërë mirë planin, pasi që dihet se është në deficit të madh dhe këto grante të komunave do t’i ndihmojnë shumë për buxhetin e vitit 2012.

Prishtina shfrytëzoi vetëm çerekun e granteve

Sipas po të njëjtave burime, më së keqi i ka punët komuna e Prishtinës, e cila vetëm 25 për qind i ka të shfrytëzuara grantet qeveritare. “Prishtina ka shfrytëzuar vetëm 25 për qind të granteve qeveritare për këtë vit, dhe asaj i ka mbetur shumë pak kohë për të shfrytëzuar pjesën e mbetur. Andaj, Qeveria e ka të drejtën që kur të bëjë rivlerësimin e shfrytëzimit të granteve qeveritare nëpër komuna, ato para që nuk janë shfrytëzuar t’i rikthejë në buxhet të shtetit”, ka bërë të ditur burimi i gazetës.

Edhe kryetari i Asociacionit të Komunave të Kosovës, Sazan Ibrahimi, shpreh shqetësimin për këtë gjendje. “E dimë se grantet qeveritare për projekte kapitale komunat këtë vit i kanë marrë vonë, shkaku i vonesës së krijimit të Qeverisë. Dhe tani ekziston rreziku që paratë që nuk janë shfrytëzuar, ashtu siç është paraparë me plane, të tërhiqen prej qeverisë”, tha Ibrahimi për “Zëri”.

Ai ka shtuar se komunat nuk kanë pasur mundësi të shfrytëzojnë projektet për gjysmëvjetorin e parë të këtij viti, sepse buxheti është aprovuar në mars ndërsa grantet komunat i kanë marrë në prill. “Në tetor kur të bëhet rivlerësimi i shpenzimeve, ekziston mundësia që qeveria t’i marrë paratë e pashfrytëzuara”,tha më tej ai.

Qeveria dërgon sinjalin tek komunat

Kryetari i komunës së Suharekës, Blerim Kuçi, ka bërë të ditur se Qeveria tashmë ka filluar të japë shenjat paralajmëruese nëpër komuna për tërheqjen e granteve të pashfrytëzuara. Ai ka bërë me dije për “Zëri” se para disa dite Agjencioni i thesarit të Kosovës i ka dërguar një letër me anë të së cilës i ka kërkuar Kuçit që t’i kthejë përgjigje lidhur me planet e komunës së Suharekës për projektet që ka në plan t’i nisë në muajin tetor dhe nëntor të këtij viti.

“Me këtë letër kam frikë se kanë deshur të më bëjnë me dije se do t’i marrin paratë e projekteve që ende nuk i kemi shfrytëzuar. Sido që të jetë, neve na mbetet që të bëjmë kërkesë në Misnitri të Ekonomisë, që grantet e pashfrytëzuara të na lejojnë me i shfrytëzu në vitin fiskal 2012”, tha Kuçi.

Ai shtoi se vonesa e aprovimit të buxhetit për 4 muaj këtë vit ka vështirësuar që komunat të menaxhojnë planet brenda këtij viti fiskal. Megjithatë kryetari i Gjilanit, Qemajl Mustafa, thotë se edhe nëse Qeveria do të marrë paratë e pashfrytëzuara, ky aplan nuk do ta përfshijë edhe komunën që ai udhëheq.

Kjo pasi sipas tij, komuna e Gjilanit ka kryer shumë procedura tenderuese para se t’i marrë grantet qeveritare, kështu që kur i ka marrë ajo menjëherë i ka shfrytëzuar. “Është e vërtetë se Qeveria është vonuar, por nuk e ka fajin ajo, sepse komunat kanë pas mundësi që me udhëheqë me procedura të prokurimit, tenderit qysh në fillim të vitit, dhe pastaj me i bë pagesat, ashtu siç kam vepruar vetë unë”, tha Mustafa./zeri

293 shikime gjithsej, 1 shikime sot

Punësohen 150 veta nga trajnimet e USAID

| Ekonomi, Kosovë | 5 September 2011

Në një ceremoni të organizuar të premten, USAID ka shënuar përfundimin e raundit të tretë të programit të praktikës që rezultoi me punësimin e 150 të rinjve në kompani të ndryshme në tërë Kosovën.

Programi i praktikës është financuar nga USAID, në kuadër të Programit për Ndërmarrje Private në Kosovë. Programi ka përfshirë trajnimin profesional në kontabilitet dhe financa të zbatuar nga asociacioni AFAS si dhe gjetjen e kompanive për të përfunduar praktikën.

“Ky program i praktikës në kontabilitet dhe financa ofron një mundësi të shkëlqyeshme për të rinjtë që të marrin dijeni teknike të cilat janë shumë të kërkuara dhe të cilat mund t’i aplikojnë në vend të punës.

Këto programe ofrojnë përvojën e parë të punës për të rinjtë”, tha Craig Buck, ushtruesi i detyrës i drejtorit të USAID. Në ceremoni 300 pjesëmarrës të programit kanë marrë certifikata të përfundimit të trajnimit dhe praktikës.

Të gjithë 300 kosovarët e rijnë, studentë të Universitetit të Prishtinës, të cilët kanë marrë pjesë në program janë zgjedhur në bazë të notave të tyre. Pas trajnimit biografitë e studentëve janë dërguar në më shumë se 20 kompani të ndryshme private.

Të gjithë studentët që kanë bërë praktikë janë paguar për punën e tyre gjatë praktikës. Menjëherë pas përfundimit të praktikës gjysma e studentëve kanë pasur oferta të menjëhershme për të filluar punën në kompanitë ku ka qenë të vendosur.

Ky është viti i tretë i këtij programi të financuar nga USAID. Gjatë programit mbi 650 persona kanë kaluar nëpër trajnime dhe nëpër programe të praktikës në sektorin privat. Gjatë secilit vit punësimi i menjëhershëm i pjesëmarrësve ka qenë mbi 50 për qind./zeri

532 shikime gjithsej, 2 shikime sot

Në pritje të vendimit të AKK-së për gjoba ndaj bankave

| Ekonomi, Kosovë | 5 September 2011

Pavarësisht konkurrencës dhe hyrjes së bankave të reja në tregun e Kosovës, normat e interesit të kredive vazhdojnë të mbeten në shkallë mjaft të lartë, gjë e cila ka ngritur dyshimet për një marrëveshje të fshehtë. Ndonëse ishte pritur që në pjesën e parë të këtij viti, Autoriteti i Konkurrencës së Kosovës (AKK) të dalë me vendim për të gjobitur bankat apo jo, një gjë të tillë ende nuk ka ndodhur.

Drejtuesit e AKK-së mohojnë të kenë pasur presione të ndryshme lidhur me këtë, pasi që sipas tyre vendimi do të merret pasi që bankat të japin arsyet për shkallën e lartë të kamatës. Nga ana e saj, opozita nuk dyshon për atë që nuk ka marrëveshje mes bankave, por për këtë fajin ia hedhin institucioneve të vendit, që sipas tyre janë të involvuara në normat e larta të interesit të kredive.

Kryetari i AKK-së, Osman Ejupi ka thënë përmes telefonit për Kosovapress se dëshirojnë që të ulen në tryezë me drejtuesit e bankave dhe të bisedojnë më konkretisht, se pse janë këto norma të interesit të larta në Kosovë krahasuar me vendet në rajon.

Ejupi thotë se bankat duhet të japin arsyet se pse janë kreditë më të lartat në rajon dhe pse kanë normën më të ultë të depozitit të interesit, dhe për atë se pse dy banka zotërojnë 70 për qind të tregut kosovar. Sipas tij, pas kësaj pritet të merret vendimi për gjobitjen e bankave.

Madje ai ka bërë një krahasim, duke thënë se interesat në depozita janë 5 për qind, ndërsa interesat në marrjen e kredisë janë 16 për qind, për kredi 12 mujore. Diferenca është 11 për qind që sipas Ejupit është 300 për qind më e lartë se në rajon, ndërkaq në Kosovë janë 8 banka.

Në Shqipëri, ku operojnë 23 banka, interesat për depozita janë 3.3 për qind, ndërsa interesat për kredi janë 7.4 për qind, për periudhë 12 mujore, që është gati tri herë më e vogël.

Ndërkaq në Mal të Zi interesat në depozita janë 5.5 për qind, kurse në kredi 9.5 për qind dhe ndryshimi është 4 për qind. Edhe këtu bëhet fjalë për një periudhë 12 mujore, kurse në këtë shtet operojnë 17 banka.

Për më tepër, Ejupi thekson se këtyre ditëve është nënshkruar një marrëveshje mirëkuptimi mes Autoritetit të Konkurrencës së Kosovës dhe Bankës Qendrore të Kosovës, me qëllim të shkëmbimit të informacioneve, duke tentuar një treg të barabartë për gjithë operatorët ekonomik. Ai ndërkaq mohon të ketë pasur presione që mos të dalin me vendim për gjobitjen e bankave.

“Ne nuk kemi presione, por ne sipas ligjit çështjen e politikës financiare në Kosovë të bëjmë publike dhe t’i kyçim edhe akterët kryesor si Ministrinë e Financave dhe BQK-në, që të jenë të vetëdijshëm, se ata po abuzojnë më pozitën e tyre dhe po e dëmtojnë konsumatorin”, ka thënë Ejupi.

Nga ana tjetër, deputeti i Lëvizjes Vetëvendosje, Visar Ymeri ka thënë se normat e interesit janë mjaft të larta në tregun e Kosovës, të cilat pavarësisht konkurrencës dhe pavarësisht hyrjes së bankave në treg nuk po ulen, e që është një material i bazuar se këtu mund të ketë një marrëveshje.

Sipas Ymerit ky institucion është lënë jashtë interesit të Qeverisë, duke shtuar se kjo është e dëmshme për një ekonomi të tregut të lirë, çfarë po synon Kosova.

Deputeti i Vetëvendosjes vlerëson që presioni që bankat mund t’ia bëjnë këtij Autoriteti është i natyrshëm, pasi siç ka thënë ai bankat kanë qarkullim të madh vjetor dhe po ashtu dënimet mund të jenë të mëdha.

“Natyrisht, është në interes të bankave që të ushtrojnë presion, nuk e di tash se a ka presion apo jo, se nuk kam informata për një gjë të tillë. Por po që se ka marrëveshje mes bankave, një marrëveshje e cila është kundër rregullave të tregut të lirë, atëherë këto banka do të kishin interes për të ushtruar një presion të tillë me qenë se përfitimet që i nxjerrin ato në Kosovë janë shumë të larta me nivelin e qarkullimit dhe shumën e depozitave që i kanë nëpër llogaritë e tyre”, ka theksuar Ymeri.

Por ai mendon që edhe zyrtarët qeveritar janë të involvuar në këto norma të larta të interesit dhe këtu është arsyeja pse nuk ka ulje të normave të interesit për kredi.

“Ka eksponentë brenda qeverisë, ka ministra të cilët janë të përfshirë dhe të cilët kanë edhe biznese të veta dhe në këtë drejtim është në interes të tyre që tregu të mos funksionojë aq mirë, meqë janë në pozitë të manipulojnë tregun dhe të përfitojnë nga ky manipulim i tregut. Ne e dimë dhe kjo është sekret publik që një pjesë e konsiderueshme e qeverisë kanë edhe biznese private, ose janë të lidhur me biznese private”, ka thënë Ymeri.

Nga ana tjetër, Haki Shatri nga Aleanca për Ardhmërinë e Kosovës (AAK) vlerëson se të gjithë e dinë për një marrëveshje mes bankave, pasi që deri më tash nuk ka pas ulje të normave të interesit.

“Në opinion dihet që ka një lloj marrëveshje mes bankave lidhur me normën e kamatave edhe me plasimin e kapitalit. Ne e shohim nga vetë gjendja që i marrim nga raportet e Bankës Qendrore. Janë depozita të shumta të qytetarëve që flenë në bankat afariste, ato po shkojnë duke u rritur vit për vit, ndërsa mjetet plasmane të bankave nuk po rriten ose kanë stagnuar në nivel shumë të ultë. Në të njëjtën kohë kamatat shumë të larta për kreditë që i jepen ekonomisë”, ka theksuar Shatri.

Në bazë të ligjit të Autoritetit të Konkurrencës së Kosovës parashihen dënimet 10 për qind të qarkullimit vjetor që kanë bankat. Edhe pse 12 vjet pasluftës gjithmonë është folur për norma të larta të interesit për kredi, ato nuk kanë ndryshuar pothuajse aspak.

Kjo ka bërë që shumë herë të ankohen bizneset, në pamundësi për t’i kthyer kreditë. Madje, ka shumë biznese që kanë falimentuar për shkak të kredive, të cilat nuk kanë mund t’i kthejnë.

Kosova llogaritet që ka normat e interesit për kredi më të lartat në rajon, ndërsa normat e interesit për depozita që i posedon të vogla./bota sot

427 shikime gjithsej, 1 shikime sot

Greqia, pro anëtarësimit të Kosovës në BERZH

| Botë, Ekonomi, Kosovë | 3 September 2011

Greqia ende nuk e ka njohur Kosovën si shtet, megjithëse politika helene deri më tash konsiderohet si më pozitivja në krahasim me katër anëtaret tjerë të BE-së, Spanjës, Qipros, Rumanisë dhe Sllovakisë që nuk e pranojnë pavarësinë, disa prej të cilave as që pranojnë të kontaktojnë me zyrtarë të shtetit kosovar.

Kjo politikë do të konfirmohet edhe të enjten më 8 shtator kur shefi i diplomacisë greke, Stavros Lambrinidis, do e vizitojë kryeqytetin kosovar. Gazeta Zëri merr vesh jozyrtarisht nga një burim diplomatik ndërkombëtar se atë ditë kryediplomati helen, gjatë takimeve me zyrtarët më të lartë të shtetit të Kosovës, pritet ta zyrtarizojë edhe përkrahjen greke për anëtarësimin e Kosovës në Bankën Evropiane për Rindërtim dhe Zhvillim.

Pas anëtarësimit të Kosovës në Bankën Botërore dhe Fondin Monetar Ndërkombëtar, Kosova ka bërë pandërprerë përpjekje për anëtarësim edhe në BERZH.

Ministria e Jashtme e Kosovës, ndonëse nuk ka pranuar ta komentojë zyrtarisht këtë vizitë, një zyrtar i kësaj ministrie i ka thënë “Zërit” se Greqia “jo vetëm që e përkrah anëtarësimin e Kosovës në BERZH, por edhe është duke lobuar edhe te shtetet tjera për të njëjtën gjë”. /Telegrafi/

536 shikime gjithsej, 2 shikime sot

Perandori i BQK-së

| Ekonomi, Kosovë | 3 September 2011

Insistoi dy herë që të emërohet zëvendësguvernator Lulëzim Ismajli pa konkurs. Pasi këtë nuk ia pranoi Bordi i BQK-së, guvernatori Gani Gërguri shpalli konkursin, i intervistoi vetë gjithë kandidatët për një ditë dhe dërgoi vetëm emrin e Ismajlit në bord. Ashtu siç deshi Gërguri, u bë. Ismajli u emërua Zëvendësguvernator të enjten. Kryetari Mejdi Bektashi konfirmon se ka qenë kundër tij.

Guvernatori i Bankës Qendrore, Gani Gërguri, me përpjekjet e tij titanike arriti ta emërojë si zëvendës të tij Lulëzim Ismajlin, deri dje shef i thesarit në Ministrinë e Financave. Gërguri ia kishte dërguar dy herë bordit të bankës emrin e Ismajlit që të emërohet si zëvendësguvernator pa konkurs. Këtë ia kishte refuzuar bordi, gjegjësisht kryetari Mejdi Bektashi. Ata e kishin lajmëruar Ganiun se kjo punë duhet të shkojë vetëm përmes konkursit, e jo me emërim.

Më në fund Gërguri kishte shpallur konkurs dhe me dy vartës të tij për një ditë i kishte intervistuar mbi 15 kandidatë, duke u dhënë kohë vetëm nga 20 minuta atyre që të shfaqin idetë e tyre për zhvillimin e këtij institucioni financiar, shkruan Express.

Dy vartësit e tij s`kanë bërë pyetje asnjëherë. Ato i ka bërë vetëm Gërguri.

Pas kësaj, ai si opsion sërish para bordit e kishte dërguar vetëm emrin e Lulëzim Ismajlit. Të gjitha këto i ka marrë vesh Express përmes burimeve të veta brenda BQK’së. Bordi BQK-së në votim për emërimin e Lulëzim Ismajlit kishte votuar tre pro tij dhe një kundër. Kundër ka qenë kryetari Mejdi Bektashi.

Këtë e pranon edhe vetë Mejdi Bektashi, por nuk tregon arsyet pse ka qenë kundër.
“Unë nuk dua të flas për këtë çështje, se për këto punë janë institucionet, por vetëm mund të konfirmoj se kam qenë kundër përzgjedhjes së Lulëzim Ismajlit”, tha Mejdi Bektashi, kryetar i Bordit të Bankës Qendrore. Ai nuk komentoi as punën e guvernatorit gjatë këtij mision për pozitën e zëvendësguvernatorit. /Telegrafi/

382 shikime gjithsej, 1 shikime sot

Edhe dy javë shtesë për ofertuesit e PTK-së

| Ekonomi, Kosovë | 3 September 2011

Komisioni Qeveritar për Privatizimin (KQP) e Postë-Telekomit të Kosovës, të premten, ka marrë vendim, pasi i ka analizuar rrjedhat dhe zhvillimin e deritanishëm të procesit të privatizimit të 75 për qind të aksioneve të kësaj ndërmarrjeje publike, që ta shtyjë edhe për dy javë afatin për tenderin e privatizimit të kësaj ndërmarrjeje publike. Sipas një njoftimi të Ministrisë së Zhvillimit Ekonomik, Komisioni Qeveritar për Privatizimin e PTK-së ka konstatuar se procesi është duke vazhduar në bazë të vendimeve të Kuvendit dhe Qeverisë së Kosovës dhe me dinamikën e paraparë dhe janë kryer përgatitjet e duhura për shpalljen e tenderit për privatizimin e saj. Zyrtarët e Ministrisë për Zhvillim Ekonomik thonë se arsyeja pse u është dhënë afat shtesë dy kompanive të parakualifikuara ka qenë që ata të vendosin seriozisht nëse janë të interesuar të marrin pjesë në procesin e mëtutjeshëm të privatizimit, apo jo. Kështu kanë bërë të ditur burime brenda MZHE-së. Burimi i gazetës “Kosova Sot” ka theksuar se kërkesa për afat shtesë ka ardhur nga kompania “Deutche Telecom” , nëpërmjet “Hrvatski Telekom”, kompani e cila është parakualifikuar në fazën e parë në procesin e privatizimit të Postë-Telekomit të Kosovës. Në garë për blerjen e PTK-së është edhe kompania austriake, “Austria Telekomi”. “Telekomi kroat ka kërkuar dy javë kohë shtesë për dokumentacionet, të cilat njësia për implementimin e procesit të privatizimit i ka kërkuar nga ofertuesit, ku janë disa kushte për të cilat kompanitë duhet të deklarohen rreth tyre”, tha ky burim. Sipas tij, ata me këtë konfirmojnë nëse janë seriozisht të interesuar të marrin pjesë në privatizimin e PTK-së. Pas marrjes së këtyre përgjigjeve, kompanitë do t’i paraqesin ofertat teknike dhe financiare./kosova sot

433 shikime gjithsej, 1 shikime sot

Ligji i ri e rimëkëmb “Trepçën”

| Ekonomi, Kosovë | 3 September 2011

Pas një periudhe të gjatë memorandumi të vendosur nga Oda e Veçantë e Gjykatës Supreme të Kosovës, gjiganti “Trepça” pritet të përfshihet në një riorganizim, e më pas në likuidim nëpërmjet ligjit për “Riorganizimin e Ndërmarrjeve të Caktuara dhe Pasurisë së tyre”, i cili ka gjasa që në seancën e ardhshme të miratohet në Kuvendin e Kosovës. Sipas draft-ligjit për “Riorganizimin e Ndërmarrjeve të Caktuara dhe Pasurisë së tyre”, të cilën “Kosova Sot” e ka siguruar, ka për qëllim krijimin e kornizës legjislative që i përcakton rregullat dhe procedurat për riorganizimin dhe likuidimin e ndërmarrjeve të caktuara dhe pasurisë dhe obligimeve të tyre nën autoritetin administrativ të Agjencisë Kosovare të Privatizimit (AKP), e në këtë hyn edhe ndërmarrja “Trepça”. Ministria e Zhvillimit Ekonomik ka kërkuar nga Qeveria që nga Strategjia Legjislative për vitin 2011 të hiqet Ligji mbi “Trepçën”, i cili është propozuar nga ish-Ministria e Energjisë dhe Minierave. “MZHE ka propozuar qe si zëvendësim për Ligjin mbi “Trepçën” të hartohet ligji mbi riorganizimin e ndërmarrjeve të veçanta. Ky ligj është aprovuar në mënyrë unanime nga Qeveria dhe është aprovuar edhe në Kuvend në leximin e parë”, thuhet në përgjigjen e Zyrës për Informim të MZHE. Sipas tyre, ky ligj aktualisht është në komisionet parlamentare dhe është duke u diskutuar lidhur me zgjidhjet, të cilat ofrohen me të. Kuvendi është vend ku përcaktohet përmbajtja e ligjit dhe ku harmonizohen qëndrimet e Legjislativit. Edhe me propozimin e këtij ligji parashihet që AKP-ja t’i menaxhojë ndërmarrjet me interes të veçantë për vendin. Sipas draftligjit, kjo mundëson rehabilitimin e këtyre ndërmarrjeve dhe rikthimin e qëndrueshmërisë së tyre si biznese të vazhdueshme me qëllim që t’i sjellë përfitime ekonomisë së Republikës së Kosovës./kosova sot

451 shikime gjithsej, 1 shikime sot

AKP, TKPK te gatshëm për të depozituar në bankat vendase

| Ekonomi, Kosovë | 3 September 2011

Mbi 1 miliardë euro është shuma e Fondit të Privatizimit dhe Trustit Pensional, të cilat mbahen të ngrira në bankat vendore dhe ndërkombëtare.

Ekspertët e ekonomisë, vazhdimisht kanë kërkuar që këto mjete të hyjnë në funksion të zhvillimit ekonomik të vendit.

Mejdi Bektashi, profesor në Universitetin e Prishtinës, e vlerëson të domosdoshme kthimin e këtyre mjeteve në tregun financiar, por sipas tij, ekzekutivi i vendit urgjentisht duhet të ndryshojë legjislacionin sa i përket kësaj çështjeje.

Bektashi, konsideron se siguria e këtyre mjeteve në bankat komerciale vendore është më e qëndrueshme se sa në bankat ndërkombëtare.

Ai thotë se plasimi i këtyre mjeteve në institucionet financiare në vend, do të ndikonte në zhvillimin e përgjithshëm ekonomik, sidomos në uljen e normave të interesit për kredi, që sipas tij, janë më të lartat në rajon.

“Unë besoj se kthimi i këtyre mjeteve në Kosovë, do të ndikonte jo vetëm në uljen e normës së interesit, por edhe në funksionimin më të mirë të sistemit financiar, dhe do të ketë efekte në zhvillimin ekonomik të Kosovës, hapjen e vendeve të reja të punës, por edhe rritjen e aftësisë konkurruese të ekonomisë së Kosovës në krahasim më vendet e rajonit. Nuk mund të presim hapje të vendeve të reja të punës apo zhvillim ekonomik stabil, nëse në tregun financiar të Kosovës, normat e interesit janë kaq të larta”, thotë Bektashi.

Në anën tjetër, përfaqësues të Trustit të Kursimeve Pensionale të Kosovës, thonë se Trusti ka kërkuar nga bankat komerciale në Kosovë që të ofrojnë kushtet e tyre në mënyrë që Trusti të depozitojë më shumë mjete në këto institucione, por disa prej bankave nuk kanë shprehur interesim për një gjë të tillë.

Jeton Demi, zëdhënës në Trust, thotë për Radion Evropa e Lirë, se trusti ka shprehur vullnetin disa herë që të krijohen mundësitë ligjore dhe instrumentet financiare, që më shumë mjete të investohen në Kosovë.

“Mundësitë aktuale që ekzistojnë janë shfrytëzuar. Nëse do të ketë interesim në të ardhmen nga bankat komerciale në Kosovë për mjetet e Trustit, Bordi i Trustit mund të vendosë të depozitojë edhe më shumë mjete në to”, thotë Demi.

Megjithatë, Demi, tregon se deri në fund të gjashtë mujorit të parë të këtij viti, Trusti kishte nën menaxhim rreth 546 milionë euro./bota sot

447 shikime gjithsej, 1 shikime sot

Reciprociteti, përfitimet (jo) reale

| Ekonomi, Kosovë | 3 September 2011

Të dhënat zyrtare të institucioneve të Kosovës tregojnë se që nga fillimi i aplikimit të masave të reciprocitetit, Kosova ka shënuar përfitime të mëdha ekonomike.

Këto përftime ekonomike edhe ekspertë të çështjeve ekonomike në vend i quajnë reale.

Kryetari i Odës Ekonomike Amerikane, Lekë Musa, thotë për Radion Evropa e Lirë se aplikimi i reciprocitet dhe marrja e kontrollit të pikave kufitare nga Policia e Kosovës dhe KFOR patën rezultate pozitive në ndalimin e kontrabandës dhe kjo siç thotë ai, ndikoi që Kosova të shënojë të hyra më të mëdha.

“Përfitimet në përgjithësi mund të themi se janë evidente, përfitimi më i rëndësishëm, është në lidhje me atë se i është dhënë mundësia industrisë në Kosovë, biznesit dhe kryesisht prodhueseve që të fillojë të prodhojnë dhe të eksplorojnë produktet e tyre në tregun e Kosovës. Tani, konsumatori ka edhe produktet e Kosovës dhe mund të vendosë se çka të konsumojë, duke u bazuar në kualitetin e këtyre produkteve”, thekson Musa.

Përfitimet ekonomike për Kosovën, pas masave të reciprocitetit, ishin shënuar në mbledhjen e të hyrave.

Sipas të dhënave zyrtare të Doganave të Kosovës ka arritur një shifër rekord në mbledhjen e të hyrave në fund të muajit gusht, duke kapur vlerën prej 500 milionë eurosh.

Krahasuar me vitin e kaluar, kjo paraqet një rritje të të hyrave, sepse në periudhën e njëjtë të vitit 2010, dogana kishte mbledhur 432,5 milionë euro. Pra, ka rritje prej 67.7 milionë eurosh.

Edhe, eksperti për çështjeve ekonomike, Alban Hashani, thotë se masat e reciprocitetit mund të kenë shënuar përfitime ekonomike për Kosovën.

Megjithatë, sipas tij , duhet të punohet më shumë në stimulimin e prodhueseve vendorë, në mënyrë që këto përftime të vazhdojnë.

“Përftimet nga aplikimi i masave të reciprocitetit janë të shumë anshme dhe janë reale. Së pari Kosova ka treguar një lloj autoritetit karshi marrëveshjeve ndërkombëtare dhe së dyti ka dhënë shans për krijimin e kanaleve te reja dhe zbutjen e varshmërisë që Kosova ka pasur nga produktet e Serbisë”, thotë Hashani.

Masat e reciprocitet ndaj produkteve serbe, Qeveria e Kosovës i ka vendosur më 20 korrik të këtij viti, si përgjigje ndaj bllokadës që këto dy vende u kishin vendosur mallrave kosovare, për shkak se nuk e njohin pavarësinë e Kosovës, e rrjedhimisht edhe vulat në të cilat shkruan “Republika e Kosovës”.

Ekspertë të çështjeve ekonomike, shpjegojnë se nëse Kosova, që nga vendosja e masave të reciprocitetit ka shënuar përfitime, atëherë humbjet, sipas tyre, për tri vjet kur Kosova nuk kishte mundur të eksportojë produktet e saj në ketë shtet, janë të mëdha.

Por, siç thonë ata, humbjet më të mëdha, Kosova i ka pasur nga kontrabanda e cila është bërë në pikat kufitare me Serbinë.

“Pikat në veri, të cilat kanë qenë burim i madh joformalitetit dhe evazionit fiskal, e që ka krijuar një konkurrencë ‘jo fer’ në treg, edhe që në instancën e fundit i ka krijuar dy probleme. E para e ka dobësuar buxhetin e shtetit për shkak se shteti nuk ka arritur të vjelë taksat në këto pika, dhe së dyti i ka joshur firmat tjera të cilat kanë qenë në sektorin formal, që të futen në sektorin joformal , për arsye se ka qenë gati e vetmja mënyrë për të mbijetuar këtë treg ndaj konkurrencës së padrejtë”, shpjegon Hashani.

Në anën tjetër, kryearti i Odës Ekonomike Amerikane, Lekë Musa, thekson se Kosova kishte humbur shumë nga mos kontrollimi i pikave kufitare në veri dhe nga mosrespektimi i marrëveshjes për tregti të lirë nga ana e Beogradit zyrtarë.

“Humbjet kanë qenë në dy drejtime, e para ka të bëjë me një bilanc negativ të Kosovës, e cila është paraqitur qysh që pas luftës ku Kosova ka qenë importues i produkteve nga Serbia dhe humbjet tjera kanë qenë si pasojë e rrjedhjes së trafikimit apo qarkullimit të mallrave ilegale nga territori i Serbisë në territorin e Kosovës”, thekson Musa.

Ndryshe, autoritetet kosovare, përftimet ekonomike i kanë arsyetuar me ngritjen e kontrollit të qarkullimit të mallrave, luftimin e kontrabandës, aplikimin e metodave moderne të selektimit dhe analizës së riskut si dhe bashkëpunimit ndërkombëtar./bota sot

425 shikime gjithsej, 1 shikime sot

5200 euro për gardërobën e Kryeministrisë

| Ekonomi, Kosovë | 2 September 2011

Lavdim Hamidi – Për t’u dukur bukur para kamerave televizive dhe në takimet me zyrtarë ndërkombëtarë e vendorë, kryeministria është kujdesur t’ia bëjë zgjidhjen për garderobën stafit të vet.

Për t’i furnizuar me garderobë 8- 10 persona, kryesisht truproja dhe shoferë të kryeministrit, është lidhur kontratë me butikun “London Fashion” në Prishtinë.

Kontrata e nënshkruar në fund të muajit qershor të këtij viti kap vlerën prej rreth 5200 eurosh, përderisa procedura e kontratës është zgjedhur me kuotim çmimesh.

Në këtë butik që furnizohet stafi i kryeministrisë, çmimi i kompleteve sillet prej 110-150

euro, mirëpo aty nuk blen gardërobë kryeministri Hashim Thaçi e as zëvendësit e tij.

Fahri Sylejmani, pronar i këtij butiku, thotë për “Zërin” se gardëroba me të cilën furnizohet stafi i kryeministrisë nuk është shumë e shtrenjtë, prandaj është përzgjedhur që ta furnizojë kryeministrinë.

“Edhe me gardërobën më të lirë ata duken mirë. Është shumë me rëndësi të duken mirë, sepse ata e prezantojnë Kosovën, në takimet që i zhvillojnë me kryeministrin jashtë vendit”, shprehet Sylejmani.

Sipas tij, me gardërobë te butiku i tij furnizohen 8-10 veta, kryesisht shoferët dhe rojet e

kryeministrit, ndërsa çmimi i kompleteve sillet prej 110 deri në 150 euro.

Pavarësisht se emri i butikut është “London”, Sylejmani thotë se me gardërobë furnizohet nga Qipro, Turqia, e jo nga Anglia.

“Më herët kam blerë mall në Angli, mirëpo tash nuk kam mundësi, sepse janë shumë të shtrenjta. Unë furnizohem kryesisht me gardëroba nga Qipro, Turqia etj”, sqaron ai.

Sylejmani pohon se pavarësisht se çmimet nuk janë shumë të larta, gardëroba të cilën ua

shet stafit kryeministror është shumë cilësore dhe për këtë shkak e ka zgjedhur butikun “London Fashion”.

“Mallin që e shes është me çmime të tregut dhe shumë kualitativ”, potencon ai.

Nuk blen Thaçi

Përkundër deklaratave të pronarit të butikut “London Fashion” se gardëroba që e furnizon stafin e kryeministrisë është cilësore dhe e lirë, kryeministri, zëvendëskryeministrat dhe ministrat furnizohen në butiqet më të shtrenjta, të cilët shesin gardërobë të markave të

njohura botërore.

Sipas kontratës së nënshkruar nga kryeministria për furnizim me gardërobë, numri i tenderëve të pranuar ka qenë 3, kurse vlera më e lartë ka qenë 5935 euro./zeri

712 shikime gjithsej, 1 shikime sot